كلنا نعرف اننا نهمل الاهتمام بأنفسنا شوي برمضان بحكم الشغل ومافيه وقت وانا بعد كنت من الناس الي أهمل بس الحين خلاص مافيه اهمال حتى لو الوقت ضيق ومايمدي
نخصص لنفسنا يوم بكل اسبوع وبـ هاليوم ساعه ساعتين تكفي وحتى اقل من هالوقت ممكن يكفينا بس كـ حد اقصى
الشعر
قبل تدخلين المطبخ اعملي حمام زيت لشعرك بأي زيت انتي حابته وخليه يترطب هالكم ساعه الي بتشتغلينها ولمن تخلصين شغل تغسلين شعرك
وتحطين له ماسك وتحاولين انك ماتستشورينه وماتعرضينه للحراه ريحيه بحكم ان الزيارات والمناسابات تقل برمضان او حتى لو فيه يعني ريحيه بالوقت الي مايكون عندك مناسبات
واتركيه لمن يجف اظفريه بس لاتظفرين وهو مبلل لأنه اكبر غلط يضره ويكسر الشعر
بس وهو ناشف لاني قلت لكم بتدوينه العنايه بالشعر ان الظفر يحفظ الشعر من التساقط ويرتبه وبكذا يكثر شعرك ولو بنسبه بسيطه
مو شرط انك تعملي حمام زيت ، فيه ناس يحبون يحطون حنا لشعرهم حطي حنا ، خلطات
اهتمي بشعرك بالاهمتام الي تحبينه او الروتين الي تمشين عليه دايم ، اهم شيء لاتهملينه
في الليل ابدأي ببشرة وجهك وجسمك بعد ماتنتهين من الصلاه وقراءة القرآن كلها ساعه او أقل
البشره
امشي على روتينك العادي اقل شيء بتسوينه
وهي الغسول التونيك مقشر مرطب يعني لاتهملين وخصوصا بهالشهر الفضيل نتعرض لحراره الفرن واحنا بنطبخ وهالشيء يأثر ع بشراتنا اكيد مع حرارة الجو بتطلع لنا حبوب صغار ودهون ف لو حافظنا اقل شيء ع روتينا العادي الغسول والتونيك وكريم مرطب ...إلخ
يقلل شوي من هالمشاكل
غير هالروتين لازم ماسك مره او مرتين بالأسبوع
لانها بجد تحسن البشره وتعطي نضاره يعني لو انتي من الناس الي تهملين الماسكات وبديتي تحطينها بتشوفين فرق كبير بعد ماتستمرين عليها
ماسك من الصيدليه اي ماسك تحبينه او ماسك طبيعي تعملينه بنفسك
والاهتمام في البشره مايقتصر على بشرة الوجه وانا اتكلم عن هالروتين امشي عليه لوجهك وجسمك
سوي سكرب كل اسبوع لكامل جسمك والتركيز على اليدين والركب والمرفقين لأنها اكثر اماكن تسمر
-زيت زيتون وسكر او ملح
-بيكربونات الصوديوم وليمون هـ الأخير تكلمت عنه قبل ونتائجه تبان بعد شهر تقريباً الحين معك شهر يمديك
- وصنفره من الصيدليه سواء لوحدها او مع حمام سونا كلها تفيد البشره وتغير منها مو تسوينها مره مرتين وتقولين مافادت لا اعمليها كل اسبوع وشوفي بشرتك شلون تتحسن سواء وجهك او جسمك
وانا جد مااقولك اني اهتم الاهتمام المبالغ فيه الي مو اي احد بيقدر عليه او مو اي وحده بتصبر عليه لا انا احب الاشياء الخفيفه بس الي تجيب نتيجه وتفيد
يعني ماقلتلكم اشياء صعبه او مكلفه اشياء عندكم متوفره بس تهملونها احياناً
لوجهك
- غسول ،مقشر ،مرطب ،ماسك
ويصير يازينه
لجسمك نفس الشيء
ومرطب بعدها قد ماتقدرين ترطبين ، دائماً اقولكم هالكلام وطفشتكم منه بس جد اهتمام وتقشير وتتعبين نفسك وماترطبين ماكأنك سويتي شيء وبتكون النتيجه عكسيه
الاظافر
اهتمي فيها استعملي لها مقوي لو كانت طويله مره وتتكسر قصيها من هالوقت عشان يمديها تطول ويجي العيد وطولها معقول وحلو لأنك لو طولتيها من الحين لين العيد بتطول بزياده ماحب طول الأظافر الاوڤر مره مقزز
بس زي ماقلت قصيها وابرديها بالشكل الي تحبين وخليك لابسه القلافزات وانتي تشتغلين وتغسلين عشان يدينك واظافرك ماتتضرر ، لمن يكون ماعليك صلاه حطي المقوي في هـ الكم يوم الي ماتصلينها بتفيد اظافرك مرره
الماسكات
ماسك العسل
العسل ينقي البشره ويخفف من تهيج البشره يعني يريح البشره ومفيد
-ماسك الزبادي
الزبادي معروف يصفي البشره وكمان يعتبر مقشر للبشره طبعاً بنسبه خفيفه جداً ويفتح البشره
-ماسك الزبادي والخيار
فيه ناس يحبون يحطونها مع بعض يعتبر ماسك ممتاز الزبادي زي ماقلت يصفي ويفتح والخيار يعطي ترطيب وحيويه وانتعاش ويصفي البشره
-ماسك الأفوكادو
تجيبين افكادو تخلطيه مع زبادي او لحاله يعطي نظاره للبشره ويصفيها ، وكمان للشعر شيء مو طبيعي يعطي لمعه فضيعه
تقريباً هذي اغلب الماساكات المفضله الي نتايجها تبان مره بعد مره
ولو حابه اي ماسك من الصيدليه مايضر وانا قريت كثير انو الماسكات اذا مافادت مابتضر
يعني الماساكات والله انها شيء حلوو وتغير. من بشرتكك كثيرر وترا الاهتمام يبان
كمان حاجه مهمه انه مظهرك يكون مرتب حواجبك رتبيها شقريها من اسبوعين الى ثلاثه
مو كثير ترهقين حواجبك عشان لمن تشقرين للعيد يكون شكلها حلو ، عشان يكون شكلك مرتب ولو حصلت لك مناسبه معينه او زياره مفاجأه تكونين مرتبه وماتنحاسين
اخر شيء لاصرتي فاضيه حاولي تسترخين تعملين لك حمام وحطي لك رغوه بالنكهه الي تحبينها استرخي شوي بالمويه هالشيء يجدد لك الطاقه وتسترخين بعد التعب والشغل ويريحك وذهنك يصفى ونفسيتك ترتاح
ماعطيتكم في هالمدونه منتجات بس عطيتكم افكار
واشياء بسيطه تعملونها
حاولت اعطيكم روتين بسيط تمشون عليه وبجد بيفيدكم كثير
يعني اذا اهتميتي مابتجي ليلة العيد وانتي يبيلك شغل كثير وتعب لا بيكون خفيف اهتمامك عشان كذا اهتمي لين العيد وتشوفين ، مو تجي ليلة العيد وانتي كلك مشاكل ومو عارفه من وين تبدأين وايش تسوين لو اهتميتي يخف عليك كثيير ويجي العيد وانتي وش زينك وتشتغلين بأشياء ثانيه وتوفرين على نفسك وقت وجهد
.......
ليست هناك تعليقات:
إرسال تعليق